Gedichte

Ruesch, Kathrin
palmeblädder ziddere
durch die sunnscht ganz stilli nachtluft
de croissantmond am herbschthimmel krümelet
si siidiges licht uf schloofendi wasserlache

nohnig morge
nimmi nacht

zemmebebbdi nachtfalderflügel entfalde sich
hinder mondschiinsilberwissem fenschterglas
stehn luftkorridore offe
un du saisch zu minem ich eifach du

nohnig wach
nimmi traum

in tropfsteihöleartige räum suudled de gählstichige mond
schwarzwissmolereie uff schaddewänd
statusträchtigi freund-feind-bilder
giertättowierti marionette
verhäddere
sich in erfolgsvernarrte iihbahnstroßegedange
stolpere über wohlstandsplunder
buddle mit bludde bai im kniehoche ohmeisehuffe
un versuffe
im bluedige lorbeerwald

nohnig hell
nimmi finschter

leerdräumdi auge luege ins sunnegländ
s licht spielt mit de spinnefäde
morgeherbstsunneumleuchted
isch de dag
mit em wind im gspräch

nohnig einig
nimmi fremd

ich tascht nach ere hand und find di herz
kumm, ma nemme zemme
staistapfle statt
erfolgsleidere selli
hänn aagsäggti sprosse

nohnig do
nimmi dert

am horizont dämmeret s glügg
un ich weiß em scho e name

März 2023