Gedichte

Paul Wagner
So menggmol denk i bimer selber,
ne Grauschopf, wie-n-ich einer bi,
het nonemol 's Glücklichsii gfunde -
's cha numme ne Gottesgnad si.
Öb d' Amsle, öb Fink oder Meisli
am Fensterbrett 's Liebeslied singt:
Es schlaht an mi zartesti Saite,
wo tief in mim Innerste klingt.
So lang mir doniede no wandle,
würd eins s'ander gwiss nit verlo.
Wie hell mir mi Oberot goldet,
macht mi in der Seel inne froh.
 

Dezember 2012