CD \"Horch emol\" mit Gschichte für Kinder

Mir hen e Projekt gstartet, wo diesmol e ganz wichtigi Zielgruppe fir s Alemannisch ins Aug gfasst het: d Kinder.

D bescht Verbindung zue de Kinder - so hämmer uns iberlait - goht iber s Ohr. Wege däm het es e CD gä, uf dere mer Gschichte fir Kinder findet. Die Gschichte solle usem hittige Läbe un an d Wirklichkeit vu de hittige Kinder im Alter vun etwa 5 bis 10 Johr aknüpfe, demit sie sich do drin au wiederfinde kinne.

D Uschi Isele het sich zsämme mit em Jürgen Hack un mit Unterstützung vum Präsi Winterhalter d Umsetzung vu dem Plan verfolgt. Sie het Autore agschriebe, wo us em ganze südbadische Raum kumme sin. Dezue isch au noch e elsässische Autor un e Schwizer Autorin gfrogt wore. Die Autore, wu sich zerscht gmeldet hen, sin deno zum Zug kumme.

Rüskumme isch e CD mit acht Gschichte. Zwische dene einzelne Gschichte sin kleini Musikstückli iigspielt. Als erschtes vezellt de Stefan Pflaum vum Friederli, vum Heiner un vum Schuelhuusmeischterhund, wie sie sich um e Güzeli stritte. Deno kunnt d Margot Müller zu Wort. Sie het in ihre Gschicht „Dä alde Mann un siner Freund Schaköbbel“ ebbis vearbeitet, wo sie selber erlebt het, nämlich s Ufziäge vum e Krabb un s Ushalte vu dem sine Frechheite. In de Gschicht vu de Uschi Isele, „Ufere Burg isches so richtig romantisch“, gohts deno wieder um e Bue, wo nach em Usflug uf d Hochkönigsburg vum e Läbe als Ritter dräumt. „S Mariele“ in de Gschicht vu de Marlies Lansche isch e richtigs Fägnescht, was mer im Gspräch mit ihre Oma merkt. Un d Anja in de Gschicht „D Sunne lockt“ vu de Heidi Zöllner het au lieber anders im Kopf als des, was de Lehrer will. Dass ihre d Phantasie elimol au e Streich spiele kann, macht s Geheimnis vu dere Gschicht us.

In de Gschicht „De Überfall“ vum Markus Manfred Jung zielts deno aber fascht in Richtung Krimi, denn s goht um e plante Überfall uf e Asylanteheim, wu e paar Kinder zuefällig Wind devu kriege. S wird dramatisch, aber die Erwachsene stehn beschützend hinter dene Helde.

Au bi de Hilda Jauslin nimmt d Gschicht „De Basilisgg“ vume beschauliche Afong e dramatischi Wendung. Aber au do löst sich alles zum Guete hi uf. Degege im „Gheimnis vo dr Mamema“ ischs nit nur heiter. Doch e klei wenig Melancholie schadet jo au de Kinder nit.

Die CD kann bi uns bstellt were, entweder im Lädeli oder per E-Mail. Sie koschtet 5 Euro. Wenn sie zuegschickt were mueß, kunnt 1,50 Euro Vesand dezue.

Es bstoht fir Kindergärte und Grundschuele aber au d Möglichkeit, dass sie e koschteloses Exemplar kriege. In dem Fall melde Sie sich bitte bi uns oder bime Gruppeleiterin oder ere Gruppeleiterin.

E Wortlischte zum Veständnis vu einzelne in de Gschicht vewendete Wörter kammer do rablade.